ഒരു മലയാളം ഫോണ്ടുണ്ടാക്കിയാലോ -5

ലിഗേചർ ഭാഗം ഒന്നു്

ലിഗേചർ എന്നതുകൊണ്ടു് ഉദ്ദേശിക്കുന്നതു് ഒന്നിലധികം ഗ്ലിഫുകൾ ചേരുമ്പോൾ ഉണ്ടാകുന്ന ഒറ്റ ഗ്ലിഫ്. അതായതു്, ഒന്നിലധികം അക്ഷരങ്ങൾ ചേർന്നുണ്ടാകുന്ന അക്ഷരസമൂഹത്തെ ഒറ്റ അക്ഷരരൂപം കൊണ്ടു് ആദേശം ചെയ്യൽ എന്നു് കഷ്ടിച്ചു് പറയാം.

ഉദാഹരണത്തിനു്, "ക്ക" എന്നതു് ഒരു ഒറ്റയക്ഷരരൂപമാണു്. ക + ചന്ദ്രക്കല ചിഹ്നം + ക = ക്ക എന്നു് പറയാം.

മറ്റു ചില ഉദാഹരണങ്ങൾ:

റ + ചന്ദ്രക്കല + റ = റ്റ
ക + ചന്ദ്രക്കല + ല = ക്ല
ഗ + ചന്ദ്രക്കല + ദ + ചന്ദ്രക്കല + ധ = ഗ്ദ്ധ
ഗ + ചന്ദ്രക്കല + ദ + ചന്ദ്രക്കല + ധ + ഉ ചിഹ്നം = ഗ്ദ്ധു

ഇതാണു് ഭാഷയിൽ കൂട്ടക്ഷരം നിർമ്മിക്കുന്നതിനുള്ള ഘട്ടങ്ങൾ. ഫോണ്ടിൽ കൂട്ടക്ഷരങ്ങൾ സൃഷ്ടിക്കുമ്പോൾ ഏതാണ്ടു് ഇതേ രീതിയാണു് നാം പിൻതുടരുക.

 ലിഗേചർ ഉണ്ടാക്കാൻ രണ്ടു് മാർഗ്ഗങ്ങളുണ്ടു്. ആദ്യത്തേതു്, എല്ലാ കൂട്ടക്ഷരങ്ങളും പ്രത്യേകം പ്രത്യേകം ഉണ്ടാക്കി അക്ഷരക്കൂട്ടങ്ങളെ ആദേശം ചെയ്യിക്കലാണു്. രണ്ടാമത്തേതു്, പൊതുവായ ആദേശങ്ങളെ ചേർത്തു് ഒറ്റ നിയമമാക്കി ഏതൊക്കെ നിയമം എപ്പോഴൊക്കെ പാലിക്കണം എന്നു് നിഷ്കർഷിക്കലാണു്. രണ്ടും ഞാൻ പ്രതിപാദിക്കാം, ട്ടൊ. പതുക്കെപ്പതുക്കെ... സ്ലോലി സ്ലോലി..

മലയാളം അക്ഷരരൂപങ്ങളുടെ പൊതുതത്വങ്ങൾ വിവരിക്കുന്ന ഒരു പേജ് മൈക്രോസോഫ്റ്റിന്റെ വെബ്‌സൈറ്റിൽ ഉണ്ടു് :
http://www.microsoft.com/typography/OpenType%20Dev/malayalam/intro.mspx

ആദ്യത്തെ പേജിൽ ഹിന്ദി കണ്ടു് മുഖം ചുളിക്കണ്ട. പേജിന്റെ അവസാനത്തിൽ അടുത്ത പേജുകളിലേക്കുള്ള ലിങ്കുകൾ ഉണ്ടു്. അവ ക്ലിക് ചെയ്താൽ കൂടുതൽ വിവരങ്ങൾ കിട്ടും.

ഇവിടെയാണു് സീറോ വിഡ്ത് ജോയിനർ, സീറോ വിഡ്ത് നോൺ-ജോയിനർ എന്നിവയുടെ ആവശ്യം വിവരിച്ചിരിക്കുന്നതു്. ഞാൻ അധികപ്രസംഗിയാകുന്നില്ല, പേജുകൾ വായിച്ചു മനസ്സിലാക്കുമല്ലൊ.

അപ്പൊ ആദ്യത്തെ രീതിയിൽ കൂട്ടക്ഷരങ്ങളുണ്ടാക്കാൻ തുടങ്ങാം?

ആദ്യം വേണ്ടതു്, നമ്മൾ ഇതുവരെ ഉണ്ടാക്കിയ അക്ഷരങ്ങൾ വച്ചു് കൂട്ടക്ഷരമുണ്ടാക്കാൻ സാധിക്കുമോ എന്നു് പരിശോധിക്കലാണു്.

ക്ല എന്ന കൂട്ടക്ഷരം ശ്രദ്ധിച്ചാൽ മനസ്സിലാവും - ക എന്ന അക്ഷരവും ല എന്ന ചിഹ്നവും നമ്മൾ വെവ്വേറെ തയ്യാറാക്കിയിട്ടുണ്ടു്. അതുകൊണ്ടു് അവ ഒരുമിച്ചു് ഒരു ഗ്ലിഫ് സ്ഥാനത്തു് സ്ഥാപിച്ചാൽ കാര്യം എളുപ്പമായി.

ഫോണ്ട്ഫോർജിൽ നമ്മൾ ഇതുവരെ ഉണ്ടാക്കിയ ഫോണ്ട് തുറന്നു് "എൻകോഡിംഗ്" എന്ന മെനുവിൽ "ആഡ് എൻകോഡിംഗ് സ്ലോട്ട്സ്" എന്ന ഓപ്ഷൻ എടുക്കുക

അപ്പൊ ഫോണ്ട്ഫോർജ് ഒരു ചോദ്യം നമ്മുടെ നേരെ എറിയും:

നമ്മോടു് ഫോണ്ട്ഫോർജ് ചോദിക്കുന്നതു്, "ഗഡ്യേ, എത്ര പുതിയ ഗ്ലിഫ്ഫുകൾ ഉണ്ടാക്കാനാ പ്ലാൻ?" എന്നാണു്. തൽക്കാലം ഒന്നു് മതി. അതുകൊണ്ടു് 1 എന്നു് പറഞ്ഞു് ഓക്കെ ക്ലിക് ചെയ്യുക.

ഇനി വിൻഡോയുടെ അവസാനം വന്നാൽ പുതിയ ഒരു ഗ്ലിഫ് ഏരിയ "?" എന്ന തലക്കെട്ടോടെ പ്രത്യക്ഷപ്പെട്ടിരിക്കുന്നതു് കാണാം. ഒന്നിൽ കൂടുതൽ സ്ലോട്ടുകൾ ഉണ്ടാക്കാൻ നിർദ്ദേശിച്ചാൽ അത്രയും സ്ലോട്ടുകൾ "?" തലക്കെട്ടോടെ സൃഷ്ടിക്കപ്പെടും
പി-3

മുകളിൽ U+???? എന്നു് വന്നതു് കണ്ടോ? അതായതു്, നമ്മളിപ്പോൾ ഉണ്ടാക്കിയ പുതിയ സ്ലോട്ട് യൂനിക്കോഡിൽ ഇല്ലാത്ത സ്ലോട്ടാണു്. ഇത്തരം സ്ലോട്ടുകളിൽ വേണം കൂട്ടക്ഷരരൂപങ്ങൾ സൃഷ്ടിക്കാൻ.

സൗകര്യത്തിനു് ഞാൻ അഞ്ജലി പഴയലിപിയുടെ സഹായം തേടുകയാണു്. ഞാൻ ഇപ്പോൾ അഞ്ജലിയുടെ ഫോണ്ട് തുറന്നു് പുതിയ ഒരു എൻകോഡിംഗ് സ്ലോട്ട് ഉണ്ടാക്കി.

ഇനി വേണ്ടതു് അതിൽ ക എന്ന അക്ഷരരൂപവും ല എന്ന ചിഹ്നവും ഒന്നിച്ചു് ചേർക്കലാണു്.

0D15 എന്ന സ്ഥാനത്താണു് ക എന്ന അക്ഷരം. അതുപോലെ 0D62 എന്ന സ്ഥാനത്താണു് ല എന്ന ചിഹ്നം. അല്ലെ? സംശയമുണ്ടെങ്കിൽ pdf നോക്കൂ..

ഇനി ഇവയെ എങ്ങിനെ ഒരുമിച്ചു് ഒരു ഗ്ലിഫ് സ്ഥാനത്തു് കൊണ്ടുവരാം എന്നു് പറയാം

ആദ്യം വേണ്ടതു് നമുക്കാവശ്യമുള്ള അക്ഷരരൂപങ്ങളുടെ സ്ഥാനം നിർണ്ണയിക്കലാണു്. ഇപ്പോൾ ക്ല എന്ന കൂട്ടക്ഷരം വേണമെകിൽ 0D15 സ്ഥാനത്തുള്ള ക എന്ന അക്ഷരം, 0D63 സ്ഥാനത്തുള്ള ല എന്ന ചിഹ്നം എന്നിവ വേണം. അവ ഒരുമിച്ചു് ചേർത്തുവച്ചാൽ ക്ല എന്നാവും.

വീണ്ടും അഞ്ജലി പഴയലിപിയെ ആശ്രയിക്കുന്നു. ഒരു കാര്യം ശ്രദ്ധിക്കാനുള്ളതു്, അഞ്ജലിയിൽ 0D63യിലല്ല ല ചിഹ്നമുള്ളതു് എന്നുള്ളതാണു്. 422 എന്നു് പേരുള്ള ഒരു പ്രത്യേക ഗ്ലിഫ് സ്ഥാനത്താണു് ആ ചിഹ്നം പ്രതിപാദിച്ചിരിക്കുന്നതു്. അതുകൊണ്ടു് ലേഖനാവശ്യങ്ങൾകു് ഈ രണ്ടു് സ്ഥാനവും ഉപയോഗിക്കാം. നിങ്ങളുടെ ആവശ്യങ്ങൾക്കനുസരിച്ചു് അക്ഷരരൂപങ്ങൾ തെരഞ്ഞെടുക്കണം.


ആദ്യം ക എന്ന അക്ഷരരൂപത്തിൽ ക്ലിക് ചെയ്യുക. ആ ചിഹ്നം ഹൈലൈറ്റ് ആവും. എന്നിട്ടു്  Edit മെനുവിൽ Copy Reference എന്ന ഓപ്ഷൻ എടുക്കുക

ഇനി നമ്മൾ പുതുതായി ഉണ്ടാക്കിയ ഗ്ലിഫ് പൊസിഷനിൽ ക്ലിക് ചെയ്തു് "പേസ്റ്റ്" ചെയ്യുക. എന്നുവച്ചാൽ Edit മെനുവിലെ Paste എന്ന ഓപ്ഷൻ ക്ലിക് ചെയ്താൽ മതിയാവും. നേരത്തെ കൊടുത്തിരിക്കുന്ന ചിത്രത്തിൽ ആ മെനു കാണാം.

ഇപ്പോൾ ക എന്ന അക്ഷരരൂപത്തിന്റെ ഒരു രൂപം പുതിയ ഗ്ലിഫ് പൊസിഷനിൽ തെളിയും. 0D15ലെ ക എന്ന അക്ഷരരൂപത്തിനു് നാം എന്തെങ്കിലും രൂപമാറ്റം വരുത്തിയാൽ അതു് പുതിയ ഗ്ലിഫ് പൊസിഷനിൽ ഇട്ടിരിക്കുന്ന രൂപത്തേയും ബാധിക്കും.

ഇനി വേണ്ടതു് ല ചിഹ്നത്തെ ഇതേ ഗ്ലിഫിൽ സന്നിവേശിപ്പിക്കലാണു്. അതിനു് ആ ചിഹ്നത്തിന്റെ ഗ്ലിഫിൽ ക്ലിക് ചെയ്തു് നേരത്തെ പറഞ്ഞമാതിരി Copy Reference മെനു എടുക്കുക. പക്ഷെ പുതിയ ഗ്ലിഫ്ഫിൽ Paste ചെയ്യരുതു്. പകരം Edit മെനുവിലെ Paste Into എന്ന ഓപ്ഷൻ തെരഞ്ഞെടുക്കുക. ഇപ്പോൾ രണ്ട് അക്ഷരരൂപങ്ങളും ഒരുമിച്ചു് ഒരു ഗ്ലിഫിൽ കാണാം.

കണ്ടോ? അക്ഷരരൂപങ്ങളുടെ ഒരു റഫറൻസ് ആണു് പുതിയ ഗ്ലിഫിൽ ഉള്ളതു്. വേണമെങ്കിൽ ഓരോ രൂപങ്ങളേയും ക്ലിക് ചെയ്തു് അവ സിലെക്റ്റ് ചെയ്തശേഷം അവയുടെ പൊസിഷൻ മാറ്റുകയും മറ്റും ആവാം.

ഇതുവരെ പറഞ്ഞതു് നാം നേരത്തേ തയ്യാറാക്കിവച്ചിരിക്കുന്ന അക്ഷരരൂപങ്ങളിൽ നിന്നു് കൂട്ടക്ഷരമുണ്ടാക്കുന്ന രീതി. ക്ക മുതലായ കൂട്ടക്ഷരങ്ങൾ ഇങ്ങനെ ഉണ്ടാക്കാൻ എളുപ്പമല്ല. അവ വരഞ്ഞുണ്ടാക്കി സ്കാൻ ചെയ്തെടുക്കുകയാണു് നല്ലതു്.

ഒരിക്കൽകൂടി ഓർമ്മിപ്പിക്കട്ടെ, ഇപ്പോൾ പറയുന്ന രീതി ലിഗേചർ ഉണ്ടാക്കാനുള്ള ഒരു മാർഗ്ഗം മാത്രമാണു്. ഓപ്പൺടൈപ്പ് നിഷ്കർഷിക്കുന്ന രീതി ഇതല്ല. അത് പിന്നെ പറഞ്ഞുതരാം. മനസ്സിലാക്കാൻ കൂടുതൽ എളുപ്പം (ഹും! നല്ല എളുപ്പം!) ഈ രീതിയായതുകൊണ്ടാണു് ഇതു് ആദ്യം പറയുന്നതു്.

ഇപ്പോൾ നാം ആദ്യത്തെ ലിഗേചർ ഉണ്ടാക്കി. ഇനി, ക + ചന്ദ്രക്കല + ല = ക്ല എന്നു് ഫോണ്ടിനെ പറഞ്ഞു് മനസ്സിലാക്കണം.

അതായതു് "0D15 + 0D4D + 422 = പുതിയ ഗ്ലിഫ്" എന്നു്  ഫോണ്ടിനെ പറഞ്ഞു് മനസ്സിലാക്കണം. അതിനു് ഇനി പറയുന്ന മാതിരി ഫോണ്ടിൽ സെറ്റ് ചെയ്യണം.

ആദ്യം Edit മെനുവിലെ Gliph Infoയിൽ പോയി നമ്മൾ പുതുതായി ഉണ്ടാക്കിയ ഗ്ലിഫിനു് ഒത്ത ഒരു പേരു് കൊടുക്കുക. ഉദാഹരണത്തിനു് ആ ഗ്ലിഫിനു് kla എന്ന പേർ കൊടുത്തു എന്നിരിക്കട്ടെ. അതുപോലെ OT Glyph Class എന്ന ഡ്രോപ്‌ഡൗൺ ലിസ്റ്റിൽ Base Lig തെരഞ്ഞെടുക്കുക.

Edit മെനുവിലെ Font Infoയിൽ ക്ലിക്കുക. അപ്പോൾ നാം നേരത്തെ പരിചയപ്പെട്ട ഫോണ്ടിന്റെ മൂല്യങ്ങൾ പ്രതിപാദിക്കുന്ന Font Info വിൻഡോ തുറക്കും.

ഇനി ഇടതുവശത്തു് Lookupല് ക്ലിക്കുക. അപ്പൊ താഴത്തെ ചിത്രത്തിലുള്ള പോലെ കാണാം.

മുകളിൽ GSUB എന്ന ടാബ് ആണു് തെരഞ്ഞെടുത്തിരിക്കുന്നതു് എന്നുറപ്പുവരുത്തുക. എന്നിട്ടു് "Add Lookup" എന്ന ബട്ടനിൽ ഞെക്കുക (കൈകൊണ്ടല്ല, മൗസ് കൊണ്ടു്)

ഇനി Unspecified എന്ന മുകളിലുള്ള ബട്ടനിൽ ഞെക്കി Ligature Substitution എന്ന ഓപ്ഷൻ തെരഞ്ഞെടുക്കുക.

അതേ വിൻഡോയിൽ Lookup Name എന്ന ഭാഗത്തു് ഇഷ്ടമുള്ള ഒരു പേരും ലിഗേചറിനു് കൊടുക്കുക. OK ബട്ടനിൽ ഞെക്കുക.

ഇനി Add Subtable ബട്ടനിൽ ഞെക്കുക.

OK ബട്ടനിൽ ഞെക്കുക.

ഈ വിൻഡോയിലാണു് നമ്മുടെ ക+ചന്ദ്രക്കല... മുതലായ നിയമങ്ങൾ രേഖപ്പെടുത്തേണ്ടതു്. അതിനു് ഇനി പറയുന്ന പോലെ...

New ക്ലിക് ചെയ്യുക. പുതിയ ഒരു വരി പ്രത്യക്ഷപ്പെടും.

ആ വരിയുടെ വലതുഭാഗത്തു് കൂട്ടക്ഷരമുണ്ടാക്കുന്ന മൂലാക്ഷരങ്ങളുടെ പേരുകൾ ചേർക്കുക. ഇടതുവശത്തു് കൂട്ടക്ഷരഗ്ലിഫിനു് നാം കൊടുത്ത പേരും കൊടുക്കുക

വീണ്ടും ക്ലിക് ചെയ്തു് നാം തയ്യാറാക്കിവച്ചിരിക്കുന്ന മറ്റു ലിഗേചറുകളും ഇപ്രകാരം ചേർക്കാം.

ലിഗേചർ ശരിയായോ എന്നു് നോക്കാൻ ഗ്ലിഫ് സിലെക്റ്റ് ചെതു് Edit മെനുവിൽ Glyph Info ക്ലിക് ചെയ്തു് ഇടതുവശത്തു് Ligatures ക്ലിക് ചെയ്താൽ ആ കൂട്ടക്ഷരത്തിന്റെ അടിസ്ഥാന അക്ഷരരൂപങ്ങൾ കാണാം.

എല്ലാ കൂട്ടക്ഷരങ്ങളും ഇപ്രകാരം ചിട്ടപ്പെടുത്തി കഴിഞ്ഞതവണ ചെയ്തപോലെ ഫോണ്ട് ഉണ്ടാക്കി ഉപയോഗിച്ചാൽ കൂട്ടക്ഷരങ്ങൾ തെളിയും. കൂട്ടക്ഷരങ്ങൾ ഉണ്ടാക്കാനുള്ള ചില നിയമങ്ങൾ നേരത്തെ പറഞ്ഞ ലിങ്കിൽ (http://www.microsoft.com/typography/OpenType%20Dev/malayalam/intro.mspx) ഉണ്ടു്. അതുകൊണ്ടു് ഞാൻ വീണ്ടും എടുത്തെഴുതുന്നില്ല.

പ്രശസ്തമായ ഫ്രീഫോണ്ട് (https://savannah.gnu.org/projects/freefont/) എന്ന ഫോണ്ട് പ്രോജക്ടിലെ ഫ്രീസെരിഫ് എന്ന ഫോണ്ടിൽ മലയാളം കൂട്ടക്ഷരങ്ങൾ ഇപ്രകാരമാണു് ഉണ്ടാക്കിയിരിക്കുന്നതു്.

ഇതോടെ പഴയലിപിയിൽ പൂർണ്ണമായ ഒരു ഫോണ്ട് ആയി എന്നു് പറയാം. കേർണിംഗ് (GPOS) എന്ന ടേബിൽ ആവശ്യമില്ലെങ്കിൽ ഇത്രയും കൊണ്ടു് നമ്മുടെ ഫോണ്ട് ഉപയോഗയോഗ്യമായിരിക്കുന്നു. വേണമെങ്കിൽ നിർത്താം.

അടുത്ത ലക്കത്തിൽ ഓപ്പൺടൈപ് നിയമപ്രകാരം ലിഗേചർ ഉണ്ടാക്കുന്ന രീതി പറയാം.

ഒരു മലയാളം ഫോണ്ടുണ്ടാക്കിയാലോ? - 4

"ദിപ്പ ശരിയാക്കിത്തരാം!" എന്നും പറഞ്ഞ് മുങ്ങിയ ആളെ പിന്നെ കാണാനില്ലല്ലോ എന്ന് നിങ്ങൾ സംശയിച്ചെങ്കിൽ കുറ്റം പറയാൻ പറ്റില്ല. കഴിഞ്ഞ ഒന്നൊന്നര മാസമായി വല്ലാത്ത തിരക്കിലായിരുന്നു. കൂടെ ഒരു അയർലണ്ട് യാത്രയും. അവിടെ ചെറിയ 1-2 അബദ്ധം കാണിക്കാൻ സമയം കിട്ടി. അത് പോസ്റ്റ് ചെയ്യുന്നതാണു്‌. ജുനൈദിനെ കണ്ടിരുന്നു. ഒരു ദിവസം മുഴുവൻ പഹയന്റെ കൂടെ ചെലവഴിക്കാൻ കിട്ടി.

അപ്പൊ തിരിച്ച് ഫോണ്ടിലേക്കു്‌.

കഴിഞ്ഞതവണ ഇട്ട പോസ്റ്റിൽ തെറ്റുണ്ടെന്നു്‌ തോന്നിയിരുന്നു. ഭാഗ്യത്തിനു്‌ തെറ്റില്ല. അതുകൊണ്ടു്‌ ഇത്തവണ നമ്മൾ സൃഷ്ടിച്ച അക്ഷരരൂപങ്ങളെ ഫോണ്ട്ഫോർജിലേക്കു്‌ സന്നിവേശിപ്പിക്കാം. ഒപ്പം അത്യാവശ്യ സെറ്റിംങുകൾ ചെയ്തു്‌ ആദ്യഫോണ്ട് ഉണ്ടാക്കുകയും ചെയ്യാം.

അതിലേക്കാദ്യം ഹെക്സാഡെസിമൽ എന്നാൽ എന്ത് എന്നു്‌ മനസ്സിലാക്കേണ്ടിയിരിക്കുന്നു. ഒരല്പം സാങ്കേതികമാണു്‌ സംഗതി. കാര്യമായി മനസ്സിലായില്ലെങ്കിലും കുഴപ്പമില്ല ട്ടൊ.

ഹെക്സാഡെസിമൽ/Hexadecimal

നാം സാധാരണ പത്ത് അക്കങ്ങളാണുപയോഗിക്കുക - 0 മുതൽ 9 വരെ. ഇതിനെ ഡെസിമൽ സിസ്റ്റം എന്നു്‌ പറയും.

പത്ത് എന്ന സംഖ്യയാണു്‌ ഏറ്റവും ചെറിയ ഇരട്ടസംഖ്യ. അതെഴുതാൻ നാം 1,0 എന്നീ സംഖ്യകൾ ചേർത്തെഴുതുകയാണു്‌ ചെയ്യുന്നതു്‌. അതായതു്‌ പത്തുമുതൽ മുകളിലേക്കുള്ള സംഖ്യകൾ എഴുതാൻ 0 മുതൽ 9 വരെയുള്ള അക്കങ്ങൾ ചേർത്തെഴുതും.

കമ്പ്യൂട്ടറിൽ വിവരം സൂക്ഷിച്ചുവച്ചിരിക്കുന്നതു്‌ ഒരു പ്രത്യേകരീതിയിലാണു്‌. ഇതിന്റെ സൗകര്യത്തിനായി വികസിപ്പിച്ചെടുത്തതാണു്‌ ഹെക്സാഡെസിമൽ രീതി.

സംഗതി ലളിതമാണു്‌. ഹെക്സാഡെസിമൽ എന്നുവച്ചാൽ 16. അതായതു്‌ 10 അക്കങ്ങൾക്കുപകരം 16 അക്കങ്ങളുള്ള ഒരു സംഖ്യാരീതി അത്രയേയുള്ളു.

ഈ രീതിയിൽ 0 മുതൽ 9 വരെയുള്ള അക്കങ്ങൾ കൂടാതെ അടുത്ത 6 അക്കങ്ങളെ സൂചിപ്പിക്കാൻ ആംഗലേയ അക്ഷരങ്ങളായ A, B, C, D, E, F എന്നിവ ഉപയോഗിക്കുന്നു. താഴെയുള്ള പട്ടിക നോക്കിയാൽ മനസ്സിലാവും.

ഡെസിമൽ       ഹെക്സാഡെസിമൽ
0                       0
1                       1
2                       2
3                       3
4                       4
5                       5
6                       6
7                       7
8                       8
9                       9
10                     A
11                     B
12                     C
13                     D
14                     E
15                     F
16                     10

0 മുതൽ 15 വരെയുള്ള സംഖ്യകളെ 0 മുതൽ F വരെയുള്ള ചിഹ്നങ്ങൾ ആദേശം ചെയ്യുന്നു. F എന്നു്‌ പറഞ്ഞാൽ ഡെസിമൽ 15

അപ്പോൾ
9+1 = 10; 9+1 = A
10+1 = 11; A+1 = B
15+1 = 16; F + 1 = 10
31+1 = 32; 1F+1 = 20
255+1 = 256; FF+1 = 100

ഇതൊക്കെ എന്തിനാ പറഞ്ഞതു്‌? എന്തിനാച്ചാൽ, യൂനിക്കോഡിന്റെ അഡ്രസ്സുകളൊക്കെ ഹെക്സാഡെസിമൽ ആയതുകൊണ്ടാണു്‌. അപ്പൊ പെട്ടെന്നു്‌ 0D01 എന്നൊക്കെ കേട്ടാൽ ഞെട്ടാൻ നിങ്ങൾക്കിനി അവകാശമില്ല എന്നർത്ഥം.

ഇനി അക്ഷമയോടെ ഫോണ്ട്ഫോർജ് തുറക്കൂ...

Newൽ ക്ലിക്കുക. അപ്പൊ പുതിയ ഫോണ്ടുണ്ടാക്കാൻ സാധിക്കും (കഴിഞ്ഞ തവണ, അഞ്ജലി പഴയലിപിയല്ലേ തുറന്നതു്?)

അപ്പൊ തുറക്കുന്ന വിൻഡോയിൽ Encoding എന്ന മെനുവിൽ ക്ലിക്കി Reencode എന്ന ഐച്ഛികം തെരഞ്ഞെടുക്കുക. ഉടനെ അതിന്റെ വലതുവശത്തു്‌ കുറേ ഓപ്ഷനുകൾ തെളിയും. അതിൽ നിന്നു്‌ ISO 10646 (Unicode BMP) എന്ന ഐച്ഛികം തെരഞ്ഞെടുക്കുക.

അപ്പൊ ആദ്യം കാണിച്ചിരുന്ന ആംഗലേയ അക്ഷരങ്ങൾക്കു പുറമെ പുതിയ അക്ഷരങ്ങളും ഫോണ്ട്ഫോർജിൽ തെളിയും. അല്പം താഴത്തേക്കു്‌ വന്നാൽ മലയാളം അക്ഷരങ്ങൾ കാണാം.

ഇനി ഏതെങ്കിലും ഒരു അക്ഷരത്തിൽ ക്ലിക്കിയാൽ അതു്‌ മഞ്ഞനിറത്തിൽ ഹൈലൈറ്റ് ആവും.

ഒപ്പം വിൻഡോയുടെ മുകളിൽ മെനുവിനു്‌ തൊട്ടുതാഴെയായി ചുവന്ന അക്ഷരങ്ങളിൽ ചില വിവരങ്ങൾ തെളിയുന്നതു്‌ ശ്രദ്ധിച്ചോ?

3334    (0x0d06)     U+0D06     uni0DD06     MALAYALAM LETTER AA

ഇതിലെ 0D06 ആണു്‌ നമ്മൾ നേരത്തേ കണ്ട ഹെക്സാഡെസിമൽ സംഖ്യ.

നമ്മൾ അക്ഷരങ്ങൾ ഏതൊക്കെ ഉണ്ടാക്കണം എന്ന സംശയത്തിൽ തലചൊറിഞ്ഞു നിന്നപ്പോൾ ഞാൻ പറഞ്ഞ pdf ഫയൽ ഓർമ്മയുണ്ടോ? അതിലെ അവസാന പേജ് നോക്കൂ.

ആ എന്ന അക്ഷരത്തിനു്‌ ഇടതുവശത്തു്‌ കാണിച്ചിരിക്കുന്ന ഹെക്സാഡെസിമൽ സംഖ്യ ശ്രദ്ധിച്ചോ? 0D06 എന്നു്‌. അതുതന്നെയാണു്‌ ഫോണ്ട്ഫോർജും കാണിച്ചിരിക്കുന്നതു്‌. ഇപ്പൊ pdf മനസ്സിലാക്കാൻ എളുപ്പമായില്ലെ?

ഏതൊക്കെ അക്ഷരങ്ങൾ ഏതൊക്കെ കള്ളികളിൽ ഇടണം എന്നാണു്‌ pdf നിഷ്കർഷിക്കുന്നതു്‌. ഫോണ്ട്ഫോർജ് നമ്മുടെ സൗകര്യത്തിനു്‌ അതതു്‌ കള്ളികളുടെ മുകളിൽ ആ അക്ഷരങ്ങളുടെ ഒരു രൂപവും ചേർത്തിട്ടുണ്ടു്‌. അതുകൊണ്ടു്‌ ഇതികർതവ്യതാമൂഢതക്കു്‌ ഇനി സാധ്യതയില്ല.

ഇനി വേണ്ടതു്‌ ചില സെറ്റിംഗുകൾ മാറ്റുകയാണു്‌.

മെന്യുവിലെ Element എന്ന അവിടെ ക്ലിക്കുമ്പോൾ കാണാവുന്ന ഡ്രോപ്‍ഡൗൺ ലിസ്റ്റിൽ Font Info തെരഞ്ഞെടുക്കുക

അപ്പോഴേക്കും ദേ പുതിയ വിൻഡോ തുറന്നു.

PS Names എന്ന മെനുവിൽ ഉള്ള Fontname, Family Name, Name For Humans എന്നിവയിൽ നിങ്ങൾക്കിഷ്ടമുള്ള പേരിടുക. ആ പേരിലാവും ഇനിമുതൽ ഫോണ്ട് അറിയപ്പെടുക എന്നോർക്കുമ്പോൾ രോമാഞ്ചം കൊള്ളുക.

അതുകഴിയുമ്പോൾ നിങ്ങളിട്ട പേരു്‌ ഇതുവരെ ആരും ഇട്ടിട്ടില്ലാത്ത പേരാണല്ലോ എന്നു്‌ ഉറപ്പുവരുത്തുക. ഇനി വെറുതെ ഇത്തിരി സംഭാരം കുടിക്കുക.

അടുത്തതു്‌, ഇടതുവശത്തെ മെനുവിൽ General-ൽ ക്ലിക്കുക.

ആദ്യം Em Size നിങ്ങൾ മുൻ‍കൂട്ടി തീരുമാനിച്ച മൂല്യമാക്കുക. ഒപ്പം Ascent, Descent എന്നിവയും നമ്മുടെ മൂല്യങ്ങളാക്കുക. എന്റെ ഫോണ്ടിൽ Ascent=1600, Descent=448, Em Size=2048 (Ascent+Descent=Em Size)

ധൈര്യമായി Ok ക്ലിക് ചെയ്തോളു.

ഇനി ആ എന്ന അക്ഷരം സൂക്ഷിക്കേണ്ട കള്ളിയിൽ ഡബിൾ-ക്ലിക്ക് ചെയ്യുക. അപ്പൊ പുതിയ വിൻഡോ തുറക്കും.

File മെനുവിൽ Import എന്ന ഐച്ഛികം എടുക്കുക

അപ്പൊ പുതിയ വിൻഡോ തുറക്കും.

Formatൽ ക്ലിക് ചെയ്തു്‌ svg അല്ലെങ്കിൽ eps തെരഞ്ഞെടുക്കുക. എന്നിട്ടു്‌ നമ്മൾ നേരത്തേ വെക്റ്ററാക്കി വച്ച അക്ഷരരൂപം തെരഞ്ഞെടുത്തു്‌ Import എന്ന ബട്ടണിൽ ഞെക്കുക.

കണ്ടോ? നമ്മുടെ വെക്ടർ രൂപം "ആ" എന്ന അക്ഷരം ഇപ്പൊ ഫോണ്ട്ഫോർജിൽ കൃത്യമായി ഇരിക്കുന്നതു്‌ കണ്ടോ?!

(എന്താ പറയാ! ഒക്കെ കഴിഞ്ഞപ്പൊ ആ ചുരുങ്ങി അ ആയി!! ഇതാണു്‌ കർമഫലം!)

Metrics എന്ന മെനുവിൽ Set Lbearing എടുക്കുക

ഇവിടെ, അക്ഷരത്തിനു്‌ ഇടതുവശത്തു്‌ എത്ര സ്ഥലം വിടണം എന്നു്‌ പറയാൻ സാധിക്കും. ഉദാഹരണത്തിനു്‌ 100 എന്നു്‌ കൊടുക്കുക.

ഇതുപോലെ Metricsൽ Set Rbearing എടുത്തു്‌ വലതുവശത്തു്‌ വരേണ്ട സ്ഥലവും അടയാളപ്പെടുത്തുക.

ഇപ്പോൾ ഫോണ്ട്ഫോർജിൽ ആ എന്ന അക്ഷരം നമ്മൾ സന്നിവേശിപ്പിച്ചു.

ഇനി ഇതുപോലെ നമ്മൾ തയ്യാറാക്കിവച്ചിരിക്കുന്ന ഓരോ അക്ഷരങ്ങളും അതതു്‌ സ്ഥാനങ്ങളിൽ ഇട്ടുവക്കുക.

ഇനി നമുക്കു്‌ നമ്മുടെ ഫോണ്ട് ഉണ്ടാക്കാം.

(അപ്പൊ ഇതുവരെ ചെയ്തതോ?)

ഇതുവരെ നാം ചെയ്തതു്‌, ഫോണ്ട്ഫോർജിൽ അക്ഷരരൂപങ്ങളെ സന്നിവേശിപ്പിക്കലായിരുന്നു. ഇനി കമ്പ്യൂട്ടറിലെ ഉപയോഗത്തിനുതകുംവിധം നമ്മുടെ രൂപങ്ങളെ ഒരു ഫോണ്ടാക്കി മാറ്റേണ്ടതുണ്ടു്‌. അതിനു്‌...

File മെനുവിൽ Generate Fonts ഞെക്കുക.

അപ്പൊ താഴെ കാണും‍പോലെ ഒരു വിൻഡോ തുറന്നുവരും.

PS Type 1 (Binary) എന്ന ബട്ടണിൽ ഞെക്കി TrueType (TTF) എന്ന ഓപ്ഷൻ എടുക്കുക. ഫോണ്ട് ഫയലിനു്‌ പറ്റിയ നല്ല ഒരു പേരും കൊടുത്തു്‌ നല്ല ഒരു ഡയറക്റ്ററിയിൽ സേവ് ചെയ്യുക.

ഇപ്പോൾ നമ്മളുണ്ടാക്കിയ ഫോണ്ട് ഒരു Truetype യൂനിക്കോഡ് ഫോണ്ട് ആണ്‌. ഇതു്‌ കമ്പ്യൂട്ടറിൽ സ്ഥാപിക്കുക. വിൻഡോസ് ആണെങ്കിൽ നമ്മുടെ ഫോണ്ട് എടുത്തു്‌ C:\Windows\Fonts എന്ന ഫോൾഡറിൽ ഇട്ടാൽ മതിയാവും.

ഇനി വേർഡിലോ മറ്റോ ഏതെങ്കിലും മലയാളം യൂനിക്കോഡ് പേജ് തുറന്നു്‌ നമ്മുടെ ഫോണ്ട് സെറ്റ് ചെയ്തു്‌ നോക്കിയാൽ..

..ആകെ ഒരു വിമ്മിഷ്ടം - ഒറ്റ കൂട്ടക്ഷരമില്ല! എന്തോന്നു്‌ പഴയലിപി? ഇത് പുതിയലിപി പോലും അല്ലല്ലോ!

അതിനു്‌ കാരണം, നമ്മൾ പഴയ ലിപിയിലെ കൂട്ടക്ഷരങ്ങൾ സൃഷ്ടിച്ചിട്ടില്ല എന്നതുകൊണ്ടാണു്‌. അത് അടുത്ത ലക്കത്തിൽ പ്രതിപാദിക്കാം.

അടുത്ത ലക്കത്തിൽ ലിഗേചർ ഉണ്ടാക്കുന്ന വിധം, അഥവാ കൂട്ടക്ഷരങ്ങൾ സൃഷ്ടിക്കുന്ന വിധം.

ഒരു മലയാളം ഫോണ്ട്‌ ഉണ്ടാക്കിയാലോ? - 3

കഴിഞ്ഞ തവണ ഞാൻ ഉറപ്പുതന്നമാതിരി ഇതാ, നമ്മുടെ raster ചിത്രങ്ങളെ vector ആക്കാനുള്ള വഴി.

ആദ്യം വേണ്ട കാര്യങ്ങൾ, സ്കാൻ ചെയ്തെടുത്ത പേജിലെ ചിത്രങ്ങളെ വൃത്തിയാക്കുക, ഒരു പേജിൽ ഒന്നിൽ കൂടുതൽ അക്ഷരരൂപങ്ങളുണ്ടെങ്കിൽ അവയെ മുറിച്ചുമുറിച്ചു് ഓരോ അക്ഷരങ്ങളാക്കുക മുതലായവയാണു്. ഇനി പറയുന്ന ലിങ്കുകളിൽ പോയാൽ നല്ലതായിരിക്കും.

ലിങ്ക്‌-1
ലിങ്ക്‌-2
ലിങ്ക്‌-3


ഈ ലക്കത്തിൽ പറഞ്ഞിട്ടുള്ള സംഗതിയുടെ ആദ്യ ഭാഗങ്ങൾ വളരെ നന്നായി ഇവിടെയുള്ള വീഡിയോയിലും പറഞ്ഞിട്ടുണ്ടു്. ഉപകാരപ്പെടും. മാത്രമല്ല, curve smoothing എന്ന സംഭവവും ആ വീഡിയോയിൽ പ്രതിപാദിച്ചിട്ടുണ്ടു്. ഞാൻ ആ ഭാഗം ഇവിടെ കവർ ചെയ്യുന്നില്ല. കണ്ടു മനസ്സിലാക്കാൻ ആയിരിക്കും എളുപ്പം.


1. ആദ്യം ഇങ്‌ൿസ്കേപ്‌ തുറക്കുക. അപ്പൊ ഇതുപോലെ തുറക്കും

2. നോക്കൂ - A എന്നടയാളപ്പെടുത്തി ഒരു വൃത്തികെട്ട മഞ്ഞനിറത്തിൽ ഹൈലൈറ്റ്‌ ചെയ്തിരിക്കുന്ന ഭാഗം ഇങ്‌ൿസ്കേപ്പിൽ നമുക്കുപയോഗിക്കാവുന്ന വിവിധതരം ടൂളുകളാണു്. C എന്ന ഭാഗം നമ്മുടെ ചിത്രം എത്ര വലിപ്പത്തിൽ കാണണം എന്നു് നമുക്കു തീരുമാനിക്കാനുള്ള സ്വാതന്ത്ര്യം തരുന്നു.
(അപ്പൊ B? B ചിത്രത്തിനാനുപാതികമായി മൗസ്‌ ഇരിക്കുന്ന (x,y) കൊ-ഓർഡിനേറ്റുകൾ ആണു്)

3. File എന്ന മെനുവിൽ ക്ലിക്‌ ചെയ്താൽ ഫയൽ മെനു ഓപ്പൺ ചെയ്യും. അതിൽ Open എന്ന ഓപ്ഷൻ സ്വീകരിക്കുക.

4. അപ്പൊ ഏതാണ്ട്‌ ഇവിടെക്കാണുന്ന പോലെയുള്ള ഒരു വിൻഡോ തുറക്കും. വിൻഡോസ്‌ ഉള്ള കമ്പ്യൂട്ടറിലെ ജാലകം ചിലപ്പൊ കാണാൻ വേറെ മാതിരി ഇരുന്നേക്കാം. സാരമില്ല.

5. ഇനി നമ്മുടെ സ്കാൻ ചെയ്തു് മുറിച്ചുമുറിച്ചുവച്ചിരിക്കുന്ന ചിത്രങ്ങൾ ഓരോന്നായി നാം തുറക്കുന്നു. തൽക്കാലം "അ" എന്ന അക്ഷരം എടുക്കാം. ഞാൻ bmp എന്ന ഫോർമാറ്റിലാണു് സ്കാൻ ചെയ്തിരിക്കുന്നതു്. നിങ്ങൾ ചിലപ്പൊ tiffലോ pngയിലോ ഒക്കെയാവാം സ്കാൻ ചെയ്തു് മുറിച്ചുവച്ചിരിക്കുന്നതു്. അപ്പൊ ആദ്യത്തെ ഫയൽ തുറന്നു.

6. വെറുതെ, ആ അക്ഷരരൂപത്തിന്മേൽ ഒന്നു് ക്ലിക്‌ ചെയ്യുക. അപ്പൊ ചിത്രത്തിനുചുറ്റും ഇവിടെക്കാണുന്ന പോലെ അമ്പിന്റെ രൂപങ്ങൾ പ്രത്യക്ഷപ്പെടും.

7. ഇനി, Path എന്ന മെനുവിൽ ക്ലിക്‌ ചെയ്തു് Trace bitmap തെരഞ്ഞെടുക്കുക

8. അപ്പൊ പുതിയ ഒരു വിൻഡോ തുറന്നുവരും:

9. ശ്രദ്ധിച്ചൊ? Brightness cutoff എന്ന ഓപ്ഷനാണു് ഇപ്പോൾ സ്വീകരിച്ചിരിക്കുന്നതു്. Update എന്ന ബട്ടൻ ഞെക്കിയാൽ നമ്മുടെ അക്ഷരത്തിന്റെ രൂപം വലതുവശത്തു് പ്രത്യക്ഷപ്പെടും.

10. ഇനി വേണ്ടതു് എന്താച്ചാൽ, 0.450 എന്നു് Brightness cutoffന്റെ വലതുവശത്തു് കണ്ടൊ? അതു് പതുക്കെ കൂട്ടുകയോ കുറക്കുകയോ ചെയ്യുക. വലതുവശത്തെ രൂപം ഏതു് സംഖ്യക്കാണോ ഏറ്റവും വ്യക്തമാവുന്നതു്, അവിടെ നിറുത്തുക. എന്നിട്ടു് OK എന്ന ബട്ടൺ ക്ലിക്കുക.

11. അപ്പൊ കുറച്ചു സമയം Stop എന്ന ബട്ടൻ ആക്റ്റീവ്‌ ആവും. തുടർന്നു് വീണ്ടും OK ആക്റ്റീവാവും. ഇനി സധൈര്യം ഈ കൊച്ചുവിൻഡോ ക്ലോസ്‌ ചെയ്യാം.

12. എന്തൂട്ട്‌ തേങ്ങ്യാ ഉണ്ടായേ? എന്നു് ചോദിച്ചേക്കാം നിങ്ങൾ. പ്രധാന സംഭവം നടന്നുകഴിഞ്ഞു - അതായതു് raster vector ആയിക്കഴിഞ്ഞു. അതു് കാണണമെങ്കിൽ ഒരു കാര്യം ചെയ്യുക - അക്ഷരത്തിനു മുകളിൽ മൗസ്‌ ക്ലിക്‌ ചെയ്തു് വിടാതെ കുറച്ചുനിരക്കുക. അപ്പൊ അക്ഷരവും മൗസിനൊപ്പം നീങ്ങും. നമുക്കു് രണ്ടു് അക്ഷരങ്ങൾ ദൃശ്യമാവും.

13. ഇപ്പൊ നമ്മൾ നീക്കിയ രൂപം vector ആണു്. വിശ്വാസം വരുന്നില്ലേ? രണ്ടാം പടത്തിലെ C എന്ന ഭാഗത്തു് വലിപ്പം മാറ്റി നോക്കിയാൽ വ്യക്തമാവും.

14. കണ്ടില്ലേ? വലതുവശത്തെ അക്ഷരത്തിനു് എത്ര സൂം ചെയ്താലും വക്കുകൾക്കു് ഒരു കോട്ടവും ഇല്ല. പക്ഷെ ഇടതുവശത്തെ അക്ഷരത്തിന്റെ വശങ്ങൾ അത്ര ഷാർപ്പ്‌ അല്ല. അതുകൊണ്ടു് ഷാർപ്പ്‌ അല്ലാത്ത രൂപം raster, ഷാർപ്പ്‌ ആയ രൂപം vector.

15. ഇനി വീണ്ടും വലിപ്പം കുറക്കാം. എന്നിട്ടു് raster രൂപത്തിൽ ക്ലിക്‌ ചെയ്യുക. നേരത്തെ പോലെ രൂപത്തിനുചുറ്റും അമ്പിന്റെ രൂപങ്ങൾ പ്രത്യക്ഷപ്പെടും.

16. ഇനി Delete അല്ലെങ്കിൽ Del എന്ന കീ അമർത്തിയാൽ... അമർത്തിയാൽ?.. അമർത്തിയാൽ raster രൂപം അപ്രത്യക്ഷമാവും. ഇപ്പൊ സ്ക്രീനിലുള്ളതു് vector മാത്രം...

17. ഇനി നമുക്കു് എന്തു് ചെയ്യണം? അക്ഷരത്തിന്റെ വലിപ്പം ശരിയാക്കണം, അല്ലേ? അപ്പൊ അതിനുവേണ്ടി Object എന്ന മെനുവിൽ ക്ലിക്‌ ചെയ്തു് Transform തെരഞ്ഞെടുക്കുക.

18. അപ്പൊ ഇങ്ങിനെയാവും സ്ക്രീൻ

19. Scale proportionally എന്ന ചെക്‌ൿബോക്സ്‌ തെരഞ്ഞെടുക്കുക. അതുപോലെ % ചിഹ്നം കാണുന്ന അവിടെ ക്ലിക്‌ ചെയ്തു് px തെരഞ്ഞെടുക്കുക.

20. ഇനി, നിങ്ങളുടെ ഫോണ്ടിന്റെ x-height എത്രയാണോ, ആ സംഖ്യ Height എന്ന ഭാഗത്തു് സെറ്റ്‌ ചെയ്യുക.

21. ഇനി Apply എന്ന ബട്ടൻ അടിച്ചാൽ സ്വയമേവ width അഡ്‌ജസ്റ്റ്‌ ആയി അക്ഷരരൂപം വലിപ്പം മാറും.

22. ഇനി File മെനുവിൽ Document properties സിലെക്റ്റ്‌ ചെയ്യുക.

23. ദേ, പിന്നേം പുതിയ വിൻഡോ തുറന്നു

24. Fit page to selection എന്ന ബട്ടൻ ക്ലിക്കിയപ്പോൾ... Height, Width അക്ഷരരൂപത്തിന്റെ വലിപ്പത്തിൽ സ്വയം സെറ്റ്‌ ആയി.

25. ഒരു കാര്യം - വിൻഡോസിൽ ഈ പുതിയ വിൻഡോ വേറെ രീതിയിലാവും വരിക:

26. വിരോധമില്ല - Resize page to content എന്ന വാക്യത്തിന്റെ ഇടതുവശത്തു് ഒരു + ചിഹ്നം കണ്ടല്ലോ? അതിൽ സംശയിച്ചു് സംശയിച്ചു് ക്ലിക്‌ ചെയ്യുക. അപ്പൊ ഇതുപോലെയാവും അവസ്ഥ:

27. എല്ലാ സംഖ്യകളും പൂജ്യമാക്കി Resize page to drawing or selection ക്ലിക്കിയാൽ 24ഇൽ പറഞ്ഞപോലെ എത്തും.

28. അടുത്തതു് Heightഉം Widthഉം നമ്മുടെ em-size എത്രയാണോ, ആ സംഖ്യയാക്കുക. എന്റെ ഫോണ്ടിൽ 2048 ആയതുകൊണ്ട്‌ ഞാൻ 2048 എന്നാക്കി.

29. OK ഒന്നും അടിക്കാൻ ബട്ടൻ ഇല്ല. അതുകൊണ്ട്‌ ആ കുഞ്ഞിവിൻഡോ ക്ലോസ്‌ ചെയ്യുക. ഇപ്പൊ നമ്മുടെ അക്ഷരരൂപം 2048x2048 വലിപ്പമുള്ള ഒരു കള്ളിയുടെ ഇടതുവശത്തു താഴെ മൂലയിൽ കിടക്കുന്നതു കണ്ടല്ലോ?

30. ഹാവു... പ്രധാനവാർത്തകൾ കഴിഞ്ഞു. ഇനി രൂപം സുരക്ഷിതമായി ഒരു ദിക്കിൽ എടുത്തുവക്കാം. അതിനു് File മെനുവിൽ Save as ക്ലിക്കിയാൽ....

31. svg ആയും eps ആയും ഓരോ അക്ഷരവും സംരക്ഷിച്ചുവക്കുക. ഓരോ അക്ഷരവും ഇപ്രകാരം vector ആക്കാം.

32. ചില അക്ഷരങ്ങൾ പലപ്പോഴും ബേസ്‌ലൈന്റെ ചുവട്ടിലേക്കു നീളും. ആ എന്ന അക്ഷരം ഒരു ഉദാഹരണം. അങ്ങിനെ വരുമ്പോൾ നാം വരച്ച ചിത്രത്തിന്റെ വലിപ്പത്തിനു് ആനുപാതികമായി വേണം 20​‍ാമത്തെ പടിയിൽ സംഖ്യ ചേർക്കേണ്ടതു്. അതുപോലെ ഇംഗ്ലിഷിലെ capital അക്ഷരങ്ങൾക്കു് വലിപ്പം caps-height ആയേക്കും, അല്ലെങ്കിൽ ascender ആയേക്കും. എങ്കിൽ ആ മൂല്യം വേണം height എന്ന ഫീൽഡിനു് 20​‍ാം സ്റ്റെപ്പിൽ കൊടുക്കേണ്ടതു്. അതുപോലെ ചന്ദ്രക്കല മുതലായ ചെറിയ അക്ഷരങ്ങൾക്കും ആനുപാതികമായ വലിപ്പം കൊടുക്കുക. ചുരുക്കത്തിൽ, നമ്മൾ അക്ഷരരൂപങ്ങൾ വരച്ചപ്പോൾ അവയുടെ വലിപ്പം എത്രയണുദ്ദേശിച്ചതു് എന്നതിനെക്കുറിച്ചു് നമുക്കു് നല്ല ധാരണ വേണം.

ഇതാ 2-3 ലിങ്കുകൾ കൂടി - സ്കാൻ ഇമേജുകളെ വെക്ടരാക്കുന്ന പ്രക്രിയ പറയുന്ന പേജുകൾ: ഒന്നു് രണ്ട്‌ മൂന്നു്

ഇപ്പൊ തോന്നുന്നുണ്ടാവും.. പണ്ടാരം... ഇത്രക്കൊക്കെ ബുദ്ധിമുട്ടണോ? എന്നു്. എന്ത്‌ ബുദ്ധിമുട്ടു്? നമ്മുടെ മലയാളഭാഷക്കുവേണ്ടി അല്ലേ?

ഒരു കാര്യം കൂടി - ഒരുപാടു് അക്ഷരരൂപങ്ങൾ നിറഞ്ഞ ഒരു പേജ്‌ സ്കാൻ ചെയ്ത ഇമേജ്‌ മുഴുവൻ ഒറ്റയടിക്കു് വെക്റ്ററാക്കിയാലോ എന്നു് ചിലപ്പൊ നമുക്കു് ദുരാഗ്രഹം തോന്നാം. പാടില്ല. പാടിയാൽ, ഓരോ അക്ഷരങ്ങളായി വേർതിരിച്ചെടുക്കാൻ ബുദ്ധിമുട്ടും. ചിലപ്പൊ ഇരട്ടിപ്പണിയായേക്കും.

ഇനി ഫോണ്ട്ഫോർജ്‌ തുറന്നു നോക്കുന്ന പരിപാടി.

ഇത്തവണ അധികമൊന്നും ഫോണ്ട്ഫോർജിൽ ചെയ്യേണ്ട. നമുക്കു് ഒരു ഫോണ്ട്‌ ഒന്നു് തുറന്നു് നോക്കാം. ഇന്നു് ഇന്റർനെറ്റിൽ ഏറ്റവും വ്യാപകമായി ഉപയോഗിക്കുന്ന അഞ്ജലി പഴയലിപി തന്നെ തുറന്നു് നോക്കാം.

ഈ അവസരത്തിൽ അഞ്ജലി പഴയ ലിപി എന്ന ഫോണ്ട്‌ സൃഷ്ടിക്കുകയും ഇന്റർനെറ്റിൽ മലയാളഭാഷയുടെ ഉന്നമനത്തിനുള്ള പ്രവർത്തനങ്ങൾക്കു് വലിയൊരളവിൽ കാരണക്കാരനാവുകയും ചെയ്ത കെവിനു് നന്ദി പറയുന്നു. ഇത്തരമൊരു ഫോണ്ട്‌ ഗൈഡ്‌ എഴുതാൻ അദ്ദേഹം തന്ന പ്രോത്സാഹനം വലുതാണു്.

അപ്പൊ, നിങ്ങൾ ഒരുപക്ഷെ വിൻഡോസിലാവും ഫോണ്ട്ഫോർജ്‌ ഇൻസ്റ്റാൾ ചെയ്തിട്ടുണ്ടാവുക, ല്ലേ? എങ്കിൽ ആ ഫോൾഡറിൽ അഞ്ജലി പഴയ ലിപി ഫോണ്ടിന്റെ ഒരു കോപ്പി കൊണ്ടിടൂ.

(അതേ ഫോൾഡറിൽ കൊണ്ടിടാൻ പറഞ്ഞതിനു് പ്രത്യേകിച്ചു് സാംഗത്യമൊന്നുമില്ല. അതേ ഡ്രൈവിൽ എവിടെയെങ്കിലും ഫോണ്ട്‌ ഫയൽ ഇരുന്നാൽ മതി. പക്ഷെ നേരിട്ടു് C:\WNDOWS\FONTS എന്ന ഫോൾഡറിൽ നിന്നു് ഫോണ്ട്‌ തുറക്കാം എന്ന മോഹം വേണ്ട. അതുകൊണ്ടു് ഒരു കോപ്പി എടുത്തു് സൂക്ഷിക്കുന്നതാ നല്ലതു്)

1. അപ്പൊ ഫോണ്ട്ഫോർജ്‌ തുറന്നല്ലോ? ഇതുപോലെ ഫയൽ തെരഞ്ഞെടുക്കാനുള്ള വിൻഡോ തുറക്കും

2. അഞ്ജലി പഴയ ലിപി തെരഞ്ഞുപിടിച്ചു് OK ക്ലിക്കുക. അപ്പൊ ഫോണ്ട്‌ തുറക്കും. ചിലപ്പൊ രണ്ട്‌ വിൻഡോ കണ്ടെന്നിരിക്കും. ഒന്നു് ഫോണ്ടും രണ്ട്‌ വാർണിംഗുകളും.

3. വാർണിംഗ്‌ വേണമെങ്കിൽ ക്ലോസ്‌ ചെയ്യാം. ഇനി ഫോണ്ട്‌ വിൻഡോയിൽ Element മെനുവിൽ font info എന്ന മെനു ക്ലിക്‌ ചെയ്താൽ...

4. ഇപ്പോൾ വരുന്ന വിൻഡോയിൽ അഞ്ജലി ഫോണ്ടിന്റെ പെരു് സൂക്ഷിച്ചിരിക്കുന്നതു് കാണാം. അതുപോലെ വേർഷനും കോപ്പിറൈറ്റും ഒക്കെ കാണാം. ഈ വിൻഡോയെപ്പറ്റിൽ അടുത്ത ലക്കങ്ങളിൽ കൂടുതൽ പ്രതിപാദിക്കും എന്നുള്ളതുകൊണ്ടു് അധികം പറയുന്നില്ല.

5. ഫോണ്ടിന്റെ ഏറ്റവും മുകളിൽ ഇംഗ്ലീഷ്‌ അക്ഷരരൂപങ്ങൾ

6. കുറച്ചു താഴെ വന്നാൽ മലയാളം അക്ഷരങ്ങൾ - അടിസ്ഥാന അക്ഷരങ്ങൾ മാത്രം. അതായതു്, നമ്മൾ ഇപ്പോൾ സൃഷ്ടിച്ചുവച്ചിരിക്കുന്ന അക്ഷരങ്ങൾ

7. ഏറ്റവും താഴെ കൂട്ടക്ഷരങ്ങളും മറ്റും

8. ഇനി ഏതെങ്കിലും അക്ഷര രൂപത്തിൽ ഒരിക്കൽ ക്ലിക്‌ ചെയ്യുക. ആ അക്ഷരം ഹൈലൈറ്റ്‌ ആവും.

9. അവിടെ double-click ചെയ്താൽ അക്ഷരം വേറൊരു വിൻഡോയിൽ തുറന്നു് അതിലെ അക്ഷരരൂപത്തിന്റെ വിശദാംശങ്ങൾ കാണാം.

കൂടെ വേറെ രണ്ട്‌ ചെറിയ വിൻഡോകൾ കണ്ടല്ലോ? അതിനെക്കുറിച്ചു് പിന്നെ പറയാം. സീക്രട്ടാ!

10. ഇവിടെ നോക്കു. Baseline, ascender, descender എന്നിവ സൂചിപ്പിക്കുന്ന വരികൾ കണ്ടല്ലോ? ഇടതുവശത്തും മുകളിലും ബ്രൗൺ നിറത്തിൽ ഹൈലൈറ്റ്‌ ചെയ്തിരിക്കുന്നതു് റൂളർ ആണു് - അളവുകൾ സൂചിപ്പിക്കാൻ. നീലനിറത്തിൽ ഹൈലൈറ്റ്‌ ചെയ്തിരിക്കുന്നതു്, പണ്ട്‌ പറഞ്ഞ മാതിരി ലൈനിൽ ഒതുങ്ങാതെ കുറച്ചു പുറത്തേക്കുപോകുന്ന സംഗതിയുണ്ടല്ലോ, വളഞ്ഞ രൂപങ്ങൾക്കു്; അത്‌. വലതുവശത്തു് മുകളിൽ Total width എന്നെഴുതിയേടത്തു് കാണുന്ന 2863 എന്നുള്ളതു് അക്ഷരത്തിന്റെ വീതി.

അടുത്ത ലക്കത്തിൽ വെക്ടർ രൂപങ്ങളെ ഫോണ്ട്‌ഫോർജിൽ സ്ഥാപിക്കൽ, ഫോണ്ടിന്റെ പ്രോപ്പർട്ടീസ്‌ സെറ്റ്‌ ചെയ്യൽ, ആദ്യ ഫോണ്ട്‌ ഉണ്ടാക്കൽ എന്നിവ പ്രദിപാദിക്കാം. അപ്പോഴേക്കും അക്ഷരങ്ങൾ റെഡിയാക്കു.